undasalin: maningning

uy, 143rd entry! pagkatapos ng putol ay ang salin ng inyong lingkod ng tula ni maningning miclat. may sarili niyang salin ang makatang nagpatiwakal, pero pangako, hindi ko iyon sinilip bago ko ininterpret via salin, wateber the fvck dat means, ang kanyang tula mula sa ingles. ang naging paborito kong tula ni maningning miclat ay yung para sa kanyang namayapa na, sa kanyang pinaglalaanan ko taun-taon ng paggunita tuwing oktubre, yung tula ay "paghuli sa saglit at pagpapanatili nito habang buhay" na noong mayo ipinaskil dito sa carcosite. bago ang lahat, nais ko munang ibahagi lahat ng tab na nakabukas bago ko sila ipagsasasara lahat kasi gusto ko lang magbahagi dahil ibinahagi rin sila ng ilang kaibigan. may naispatang tumblr site alay kay death ng endless. at mga tula ni chingbee cruz sa cordite. at mga ugnay (link?) bilang pagdiriwang kay vonnegut, at mga pabalat ng unang edisyon ng mga akda niya. at zombie bilang alipin. at tulang "alabanza" ni espada. at mga kuhang larawan ni vanya berezkin, tampok si nadezhda ng pussy riot. ang kasalukuyang kinahuhumalingang pagmumukha:

At Pagkatapos ay ang Sakit ng Ulo
interpretasyon (?) ni tilde acuña ng tula ni maningning miclat

At pagkatapos ay sumakit ang iyong ulo
habang nasa loob ng Pambansang Museo
sa paglakad
sa pagtayo
sa pagtunghay
sa pag-intindi
sa lubos na kaligayahan
at pagkamangha.

Mula Kanluran hanggang Silangan,
sa lahat ng naging,
sa lahat ng darating at magiging,
sa lahat ng dati'y matibay.
Ang pinagmulan ng nilagusan ng panahon,
ang pinagmulan ng buhay na binago ng mga pangyayari,
ay hindi ang mga naisalarawan mo
mula sa mga librong minsan mong binasa.

Mga dambana upang sambahan,
mga palasyo upang palamutian,
mga porselana at mga hiyas,
mga bangkay at mga kabaong,
at bawat katawagan at paglalarawan
ay may kahulugan sa iyo.
Iyan ang dahilan ng umaapaw mong saya
sa lahat ng naisiwalat,
sa garbo at talino,
sa mga buhay at alaala,
sa kung anumang itinira at inipon,
sa kung anumang pinangalagaan at pinag-aralan.

Sa tatlong araw, ika'y
bilanggo ng museo.
Sa takipsilim,
sumakit ang iyong ulo,
at tumulo ang mga luha:
sa kayamanang iyong nasaksihan,
sa kaalamang iyong naintindihan,
sa labis na pagkakalugmok,
sa labis na pagsisiya,
sa panahong ika'y naghintay,
sa paghihirap na iyong nalampasan,
bago ang pagkakataong
makalakad at makatayo,
makatunghay at makaintindi,
makapagsaya nang lubos.

At kaya nakaranas ka ng sakit ng ulo,
isang matinding, matinding sakit ng ulo.

sa post na ito, karapatang-ari ni vanya berezkin ang lahat ng litrato.